魚蛋米 Fish Balls with Vermicelli Noodles

清清地嚟個魚蛋米 with 油菜~

雙丸芋絲配波菜 Fish and Squid Ball with Shirataki Noodles and Spinach

肥肥瘦瘦肥肥瘦!
自從再次屈親腳, 成個月行唔到之後, 都無點樣做劇烈運動了.
再加上拍拖出街食食食, 一年過去, 就係咁肥肥肥落去了.
從今天起, 要從長計議先得!~

自我檢討, 之前減過咁多次肥, 都係好極端地減, 一個星期做最少五日 gym, 仲會一日兩次, lunch time 去, 放左工又去. 超癲! 仲要戒埋澱粉質, 個人成日都好"支力" 呀!
今次立志, 要健康&平衡地減. 可能煮嘅野食會無咁香濃肥味, 希望睇開我 blog 嘅網友唔會咁樣走左去啦!!~

不過, 我諗好多人都係 keep fit 派~
一起食得健康點吧!!~ ^^

今次煮左個雙丸芋絲波菜. 有墨魚丸& 好得意嘅魚包蛋. 魚包蛋係台灣出品~ 魚蛋入面有魚籽 (fish ball with roe), 幾好食架! 加埋芋絲&波菜, 好有包肚感. 減肥食芋絲就最啱, 芋絲卡路里好低, 我地一般人所需要用嘅 energy 去消化芋絲係多過芋絲本身嘅卡路里, 所以芋絲係減肥勝品, 食多幾舊都唔怕.

芋絲同芋頭係無任何關係的. 芋絲 e 種低卡低 carbs 食物, 叫做 Shirataki. 主要成份係蒟蒻, konjac~ 所以話食得清 d 都可以好味架!~ ^^


芋絲 Shirataki


魚包蛋 Fish Ball with Roe

紫菜鯪魚球豆腐煲 Fish Balls with Tofu and Seaweed

快樂的時光永是跑得快. 一個愉快的長週末就這樣過去了. 總算沒有白過.
享受了聖地牙哥兩天自由行, 主要目的是去 Skydiving. 一個 plan 了良久又一直沒有機會實行的活動. 終於, 都可以在 bucket list 中 Skydiving 的一項畫個叉叉. 如果要寫一本叫做 "臨終前想做的一百件事", 會有些什麼東西在裡面呢? 有人聽到會說大吉利是, 又或是從來沒想過. 有人問我, 你不怕死嗎? 說實的, 死, 有什麼可怕的地方呢? 來這世界時一物也沒帶來, 死又豈能帶走什麼. 相信死後有永生, 便什麼也不用怕了. 最怕人生在世什麼貢獻也沒有便要走. Skydiving 之後, 就好像體會了又一次的死不掉. 哈哈, 說我傻也好, 說我瘋也好吧. 說笑的, 那有走得這麼容易, 那麼便宜! 做人, 也不用太執著吧. 只是時候未到.

今次整左個豆腐煲, 清清地清下腸胃, 都是一連幾日食得放肆的原故.

材料:
豆腐、紫菜、魚漿、生菜

調味:
白胡椒粉、鹽、糖

做法:
1. 魚漿用白胡椒粉、鹽、糖調一調味攪匀備用。
2. 豆腐切粒、生菜切絲、紫菜剪細備用。
3. 水一煲煮滾, 用匙將魚漿做成一舊舊放入滾水中煮一分鐘, 加豆腐、生菜、紫菜再煮兩分鐘搞掂, 加點醬油調味食得。

[ 老少平安 ]魚漿蒸豆腐 Steamed Tofu with Fish Paste

方便、快趣、好野!!~

今日介紹個老少平安俾大家, 大人細路都啱食, 食落口感似蒸蛋, 有益有營養好味唔肥唔貴又易整. 仲可以要求 d 乜 wor?! ;P

材料:
魚漿、豆腐、蔥、鹽少少、胡椒粉少少、生粉兩茶匙

做法:
1. 蔥切粒備用。 豆腐攪爛隔去水份備用。 魚漿用鹽&胡椒粉攪匀醃一陣備用。
2. 將豆腐、魚漿、一半蔥粒混合, 加生粉攪匀放碟內隔水大火蒸大約十分鐘, 再將其餘蔥粒放面加點豉油(個人喜好)搞掂食得。

魚餅炒卷心菜 Pan-fried Cabbage with Fish Cake

本身唔係好"好" cabbage. 不過用黎炒魚餅又唔錯 bor!!~ ;P
魚餅我用左 Yamasa 魚餅, with Burlock (牛蒡)嗰隻. 切成一片片咁炒 d 菜黎食, 方便又好味!!~


食療知多 d:
牛蒡又叫黑根, 可促進血液循環，新陳代謝，有清熱解毒的作用，內含豐富粗纖維，能促進腸蠕動, 排除穢物，可抑制大腸癌，並預防膽固醇過高。

牛蒡同牛係無任何關係架!!! 牛蒡係植物黎架, 屬菊科草本. 外形一條條, 根形, 有 d 似人參, 花名又叫 "大力参". 好搞笑!!~

材料:
卷心菜、魚餅、洋蔥、蔥、水、雞湯、鹽、糖

做法:
1. 卷心菜洗淨切細。 魚餅切件飛水。洋蔥切細、蔥切粒備用。
2. 熱鑊落油, 炒香洋蔥, 加卷心菜加點鹽&糖炒一陣, 加點水&雞湯, 加蓋煮十分八分鐘, 加魚餅&蔥粒兜匀搞掂食得。

XO醬蘿白絲 Medallions

經濟唔好, 都少左好多人打 golf. 始終 golf 都係 d 可有可無的東西. U.S. office e 邊又走了一個. 總共貢獻了十二年了的光陰, 總共, 係因為公司員工都興中途離場再歸隊. 真係好奇怪的公司. 唔知佢今次一走, 會唔會過幾年又返黎呢? ;T

今次整左個非一般的蘿白絲魚肉煎餅, 辣辣地, 幾醒胃!

材料:
蘿白、魚漿、絞豬肉、豉油、糖、鹽、胡椒粉、chili pepper、XO醬、雞湯、生粉、水

做法:
1. 蘿白去皮刨絲備用。
2. 魚漿加鹽、胡椒粉、chili pepper攪匀, 絞豬肉加少許豉油、糖攪匀。
3. 混合魚漿和絞豬肉。
4. 蘿白絲放魚漿絞豬肉攪匀, 用手搓成球狀壓扁做迷你扒。
5. 熱鑊落油, 把蘿白餅煎至兩面金黃, 加少許XO醬、豉油、糖、雞湯、水, 加蓋煮五分鐘。
6. 再加生粉水埋芡搞掂。

Ingredients:
turnips
fish paste
ground pork
soy sauce
sugar
salt
pepper
chili pepper
XO sauce
chicken broth
corn starch
water

Directions:
* Peel and shred turnips.
* Add salt, pepper and chili pepper into fish paste, mix well. Add soy sauce and sugar into ground pork, mix well.
* Combine fish paste and ground pork.
* Mix fish paste, ground pork and shredded turnips together till well combined. Mold into round medallion shape like mini patties by hand.
* Put oil in heated pan. Fry turnip patties until both sides turn brown. Add some XO sauce, chicken broth and water. Cover and simmer for about 5 minutes.
* Add corn starch water, combine well. Ready to serve.

煎釀一寶の茄子 Pan-fried Eggplant with Fish Paste

上個禮拜去娘娘婆度食飯, 佢煮左味魚肉釀茄子, 超好味, 於是乎擺明偷師, 今晚決定試整! 味吉陽一都話好食 wor ;P

材料:
茄子 2條、鯪魚肉、絞豬肉、豆豉、鹽、胡椒粉、糖、雞湯、豉油、生粉、水、蔥花各適量

做法:
1. 茄子洗淨後切厚片, 豆豉切碎備用。
2. 鯪魚肉、絞豬肉用糖、鹽、胡椒粉攪匀。
3. 茄子撲上一層薄薄生粉, 用刀釀上魚豬肉。
4. 起鑊, 加少許油, 將已釀好魚豬肉的茄子煎(先煎魚豬肉的一面)至兩面金黃, 兜起。
5. 起鑊, 加少許油, 爆香豆豉, 加雞湯、豉油、糖, 茄子回鑊。
6. 加蓋煮約五分鐘, 再用生粉加水, 埋芡, 加蔥花搞掂上碟。

e 邊 d 鯪魚肉無 H.K. 嗰 d 咁爽咁有咬口, 所以加 d 絞豬肉入去一齊釀, 會比較有質感, 好食 d 架!~ 如果唔鍾意絞豬, 加絞雞肉都得架, 一樣咁好食! e d 野好睇個人喜好啦, 無乜所謂嘅~