蝦仁炒滑蛋 Scrambled Egg with Shrimps

蝦仁炒滑蛋, 可以話係我其中一樣都幾 comfort 嘅 comfort food. 有時都會去鳳城買個蝦仁蛋蛋飯黎食!~ 就腳吖嘛, heehee 不過自己炒, 就更健康, 少油好多呀!　　

一睇, 原來鳳城已經有四十幾年歷史 lu.. 第一間開喺唐人埠, 主要係做餐館型式, 我都好似去過一次, haha. 直到 99 年起, 一連開幾間快餐, 做外賣型式的細鋪, 加埋甜品糖水飲料小食, 價錢合理, 引入一個年輕人市場, 就開始聲名大噪. 咁類型嘅中餐喺 e 度唔多. 已經 expand 到第八間, 都係一個成功嘅例子.


用易潔鑊整, 唔洗用幾多油架啫!~ ^^

材料:
蝦仁十隻八隻、雞蛋三隻、鹽少少、生粉少少、水一湯匙

做法:
1. 蝦仁去殼去腸洗淨抹乾, 用鹽&生粉撈匀放雪櫃醃一陣備用。
2. 雞蛋加少許鹽, 加一湯匙水打匀備用。
3. 熱鑊落油, 先爆蝦仁至八成熟, 加雞蛋, 用鑊鏟撥開輕輕打兩三圈, 炒三十秒左右搞掂上碟。

備註:
- 炒滑蛋唔好炒到太熟, 鑊嘅餘熱會令蛋更熟
- 加少許水or奶落蛋度炒會使蛋蛋更滑~

燒賣兩食 Shu Mai

平時去飲茶我唔多好燒賣, 因為覺得食落成口肥豬肉, 唔係幾鍾意囉~
自家製燒賣真材實料無咁多肥豬肉, 又多冬菇又多蝦, 仲加左蟹籽係面, 我就好鍾意喇!!~ heehee 下次要挑戰香港 7-11 魚肉燒賣 - 我至愛!!~ ;D



過左黎美國好少可以食到好味嘅燒賣, 邊有身處香港咁幸福 wor. 想食唯有自己整!!


整多 d 放入冰箱冷凍隨時可以叮黎食!! 正~

材料:
絞豬肉、蝦仁、冬菇、蟹籽、雞湯、豉油、糖、燒賣皮

做法:
1. 蝦洗淨去殼去腸抹乾用鹽&生粉放雪櫃醃一陣, 然後切細細粒備用。
2. 冬菇浸軟去蒂切粒, 用蠔油醃。 絞豬肉用少許雞湯、豉油&糖醃備用。
3. 絞豬肉、蝦仁、冬菇粒拌勻, 用燒賣皮包到粒粒差唔多大小, 上面放蟹籽, 大火蒸十分鐘搞掂食得。


用剩左 d 燒賣皮, 包左幾粒做雲吞, 煮埋 d 剪左出黎的燒賣皮嘅角唔好嘥(浪費)加 d 湯加 d 蔥粒搖身一變又變左碗雲吞湯!

備註:
- 用圓形皮包燒賣比較好包, 但 e 邊好難買到圓形皮, 所以包完要修剪一下 d 角~
- 燒賣皮其實咪即係薄嘅雲吞皮囉~

焗游水立魚: 魚蝦菜一餐

趁後生, 要食多 d 海鮮!~ 由細到大都愛食魚, 其中一個原因係我爸爸鐘意出海釣魚. 佢係香港業餘釣魚會嘅永譽會長~ 我地一家人都好有口福, 食到爸爸親自釣嘅海魚, 真係超好味架!~ 講開又講, 都已經好耐無機會食 lu. 懷念中! 不過唔緊要. 魚好有營養就係人都知. 雖然 e 條立魚仔唔係 d 咩深水靚魚, 但係佢嘅營養價值都一樣咁高架. 唔好睇少佢. 食魚, 最緊要條魚夠新鮮. 我地無咁大隻碟, 無咁大個鑊去蒸嗎? 唔緊要. 攞去焗, 一樣咁好食!~ 至於蝦同埋小棠菜, 白灼白烚, 已經好好食喇!~ e 餐好滿足呀!~ 快樂, 其實可以好簡單!~ ^^

焗游水立魚

材料:
立魚一條、薑、蔥、蒸魚豉油各適量

做法:
1. 去 market 買條游水立魚, 賣魚勝會幫你劏埋, 刮埋魚鱗架喇, 好方便!
2. 帶條魚返屋企, 補刮一些賣魚勝刮漏左嘅魚鱗, 沖洗乾淨, 用 paper towel 印乾水份。 唔洗驚, 條魚唔會咬人嘅~
3. 蔥切段, 薑切絲備用。
4. 焗盤放鍚紙, 將幾條粗蔥段放焗盤上, 魚兒放蔥段上, 再加薑絲和其餘的蔥段在魚兒上面和魚肚內。 把四邊錫紙摺起, 蓋住魚兒。
5. 放入已預熱 400 ˚F 的焗爐, 焗大約 18 至 20 分鐘 (睇條魚幾大 lor, 大條 d 就要焗耐 d~), 淋上蒸魚豉油, 搞掂。