三椒豆瓣炒雞球

阿媽教落, 煮餸要色、香、味俱存嘛, 咁.. 炒辣辣雞粒用咩做配料呢?
嗰日去左韓國人超級市場買餸, 見到 d 青黃紅椒 1 pack pack 賣, 1 pack 仲有齊三隻色, 好吸引! 而且仲要特價 tim. 青黃紅椒本身帶有 d 甜味, 同豆瓣醬雞粒一齊炒, 個味道配合得一流呀!~ 你都試下整? ;D

材料：
雞胸肉兩舊、青椒黃椒紅椒各一舊、薑兩片、油、豉油、鹽、糖、豆瓣醬、蔥、胡椒粉、雞湯、生粉、水各適量。

做法：
1. 雞胸肉、青黃紅椒切粒，蔥切粒，薑切片，雞胸肉用豉油、糖、胡椒粉，醃三十分鐘備用。
2. 熱鑊下油，先加入薑、青黃紅椒爆香，再加入雞胸肉、豆瓣醬炒，加雞湯, 加蓋煮三分鐘。
3. 開蓋，加鹽、糖炒至入味，生粉加水攪匀打芡，略炒，最後加入蔥粒炒匀，搞掂上碟。