海底椰羅漢果瘦肉湯

中式老火湯, 其實一 d 都唔難整, 基本上把材料要洗的洗淨, 要去肥的去肥, 再一同放煲內文火煲兩小時即成. 今次煲左個海底椰羅漢果瘦肉湯, 海底椰潤肺清燥熱, 羅漢果化痰止咳, 紅蘿蔔清腸胃. 好啱 d 成日要捱夜嘅人飲. 好開心, 終於俾我等到, 四月十五又過了. 男朋友仔唔洗再捱夜捱到三四點. 可以慢慢正常番, 真係可喜可賀!~

材料：
羅漢果一個、瘦肉兩舊、雞腿一隻、海底椰、蜜棗、南北杏、紅蘿白、乾瑤柱各適量

做法：
1. 乾瑤柱用清水浸軟, 紅蘿白切件備用。
2. 羅漢果洗淨分開兩邊, 海底椰、蜜棗及南北杏用清水略沖洗。
3. 雞腿去皮去肥洗淨, 瘦肉洗淨一同出水, 再用清水沖淨備用。
4. 將一大煲水煲滾, 放入所有材料, 先用大火煲十五分鐘, 再轉慢火煲兩小時即成 。

備註:
- 肉類要先出水去除血水和油膩, 煲出的湯會清 d
- 雞腿、蜜棗、乾瑤柱可以唔落都得, 落左 d 湯就鮮 d 甜 d
- 先用大火煲, 再轉細火; 如果喜歡飲咸 d 嘅湯, 煲好後加鹽調味