粟米龍脷柳 Fish Fillet with Cream Corn

粟米龍脷夠香口又啖啖肉, 大小朋友都好鍾意食! 不過就比較麻煩, 因為要沾蛋汁又要煎煎炸. 我都好怕係屋企煎野同炸野, 一黎怕佢肥膩, 二黎怕成間屋都油煙味. 就算開左抽油煙機, 都一定要開窗通下風, 仲要記得關房門呀, 雖然間房喺二樓! ;P

間唔中整下都幾 OK.. 我嘅做法係喺蛋汁度加左七味唐からし同埋蒜蓉芫茜粉, 香口惹味 d 同埋癖咁 d 鯹. 最正係個汁, 最好同個龍脷柳分開上, 食嗰陣先畢 d 汁喺面, 咁樣送飯一流. 粟米汁又甜又滑又有蛋香呢!

材料:
龍脷柳半包、粟米蓉一罐、雞蛋兩隻、生粉半杯、雞湯兩湯匙、鹽、胡椒粉、七味唐からし、蒜蓉芫茜粉各少許

做法:
1. 龍脷柳解凍, 切件洗淨, 用 paper towel 印乾水份, 塗抹少許鹽、胡椒粉於龍脷柳上, 備用。
2. 生粉放碟備用; 雞蛋一隻先打匀, 加入少許七味唐からし、蒜蓉芫茜粉拌勻放平底碗備用。
3. 熱鑊落油, 比平時多少少油, 龍脷柳沾上蛋汁, 再撲上生粉, 逐一落鑊半煎炸至金黃, 兜起。
4. 粟米蓉放細煲內加雞湯煮滾, 加入另一隻雞蛋攪拌成蛋花, 加少許鹽打薄芡搞掂。

備註:
- 煎時唔好反太多次, 每塊最多反三次好喇, 睇實個火就 OK, 如果唔係 d 魚塊好易散.
- 油要夠熱同埋唔好同一時間放好多塊落鑊, 如果唔係 d 油嘅溫度急降, d 魚塊就會好吸油.